Kabtankii hore ee France, oo 43 jir ah, ayaa lagu xukumay inuu bixiyo 4,000 oo Yuuro kadib markii uu dayacay qoyskiisa. Evra ayaa lagu riday xukun 12 bilood oo xariga, kadib markii uu ku guuldareystay inuu bixiyo lacag ku dhow 1 milyan oo dollar ah oo magdhow ah oo uu siin laha xaaskiisa hore.
Garsoorayaasha Paris ayaa ku dhawaaqay in Evra uu si kas ah uga tagay xaaskiisa Sandra Evra oo 42 jir ah, iyo carruurtooda – wiil hadda 19 jir ah iyo gabadh, 10 jir ah.
Qareenada u doodaya ciyaaryahanka ayaa isla markiiba racfaan ka qaatay xukunka balse waa laga diiday.
Evra, malaayiin lacag ah ayaa qasnadiisa ku jirta , kadib markii uu guulo waaweyn ka gaaray xirfadiisa ciyaareed, balse waxaa lagu eedeeyay in uu xaaskiisii ​​hore uu siin waayay lacag dhan 969,000 oo Yuuro.
Evra wuxuu guursaday gabadhan 2007dii, laakin dacwadaha furriinka ayaa la bilaabay 2020kii, markaasoo daafacii hore ee Manchester United, Juventus, iyo Marseille lala sawiray isagoo dhunkanaya model-liistada caanka ah ee Margaux Alexandra, iyago la ogyahay in 2 caruur ay sidoo kale isku haayan.
Patrice Evra socdaalkiisa kubbadda cagta waxa uu ka bilaabmay Faransiiska ka dib markii uu ka soo guuray Senegal isaga oo dhalinyaro ah.
Wuxuu ka soo baxay oo uu saameyn muuqda ku yeeshay AS Monaco ka hor inta uusan u dhaqaaqin Manchester United 2006-dii
379 kulan ayuu u saftay Man Utd ka hor inta uusan u dhaqaaqin Juventus 2014kii.
